វេទិកាវីដេអូខ្លីធំៗទាំងបីបានបញ្ចេញការផ្លាស់ប្ដូរដ៏មានអត្ថន័យជាច្រើនសម្រាប់អ្នកបង្កើតមាតិកានៅក្នុងសប្ដាហ៍ដំបូងនៃខែកញ្ញា។ បើទោះបីជាការផ្លាស់ប្ដូរភាគច្រើនមើលទៅតូចតាចដោយឡែកពីគ្នាក៏ដោយ ក៏ការរួមបញ្ចូលគ្នានេះបានបង្ហាញពីទិសដៅដែលកម្មវិធីនីមួយៗកំពុងផ្ដោតខ្លាំង៖ ការទស្សនាផ្សាយផ្ទាល់រួមគ្នាលើ YouTube, ប្រព័ន្ធខមមិនកាន់តែសម្បូរបែបលើ TikTok និងតម្លាភាពនៃបច្ចេកវិទ្យា AI លើ Instagram។
YouTube៖ ប្រតិកម្ម, សមាជិកភាព និងរង្វាស់ទិន្នន័យលើទូរទស្សន៍
YouTube កំពុងពង្រីកលទ្ធភាពប្រើប្រាស់ការផ្សាយផ្ទាល់បែបប្រតិកម្ម "Watch With"។ ប៊ូតុងថ្មី "react live" លើទូរសព្ទដៃអនុញ្ញាតឱ្យវីដេអូកាមេរ៉ាផ្តេករបស់អ្នកបង្កើតមាតិកាបង្ហាញនៅទន្ទឹមគ្នានឹងការផ្សាយផ្ទាល់ដើមក្នុងទម្រង់បញ្ឈរ។ ការផ្សាយប្រតិកម្មនេះរកចំណូលបានដោយខ្លួនឯង ហើយអ្នកផ្សាយផ្ទាល់ដើមក៏ទទួលបានការរាប់បញ្ចូលក្នុងចំនួនអ្នកទស្សនាដំណាលគ្នា (concurrent-viewer metrics) ផងដែរ។
ការផ្លាស់ប្ដូរផ្សេងទៀតរបស់ YouTube ដែលកំពុងដំណើរការរួមមាន៖
- ស្លាក "Branded Content" មកជំនួសស្លាកចាស់ "paid promotion" ដោយគ្របដណ្ដប់លើការដាក់បង្ហាញផលិតផល ការឧបត្ថម្ភ និងការគាំទ្រផលិតផល ព្រមទាំងមានការកំណត់តាមអាយុនិងតំបន់ភូមិសាស្ត្រ។ YouTube អាចនឹងបន្ថែមស្លាកនេះដោយស្វ័យប្រវត្តិ ប៉ុន្តែបានបញ្ជាក់ថាអ្នកបង្កើតមាតិកាមិនគួរពឹងផ្អែកតែលើប្រព័ន្ធស្វ័យប្រវត្តិនេះឡើយ
- មជ្ឈមណ្ឌល Channel Memberships ថ្មីនៅ youtube.com/channel_memberships ណែនាំប៉ុស្តិ៍ដែលអ្នកទំនងជាចង់ចូលរួមជាសមាជិក
- រង្វាស់ទិន្នន័យ "Views (Co-Viewed)" នៅក្នុង Analytics ប៉ាន់ស្មានចំនួនមនុស្សដែលទស្សនារួមគ្នានៅលើទូរទស្សន៍។ វាត្រូវចំណាយពេល 48 ម៉ោងដើម្បីដំណើរការទិន្នន័យ ហើយមិនប៉ះពាល់ដល់ចំនួនមើលជាសាធារណៈ ឬការរកប្រាក់នោះទេ
TikTok៖ ខមមិនកាន់តែមានភាពរស់រវើក
TikTok កំពុងប្រែក្លាយផ្នែកបញ្ចេញមតិរបស់ខ្លួនឱ្យទៅជាទម្រង់ feed ខ្នាតតូចមួយ។ ខមមិនជាសំឡេងដែលមានរយៈពេលរហូតដល់ 60 វិនាទី កំពុងត្រូវបានដាក់ឱ្យប្រើប្រាស់សម្រាប់គណនីដែលមានអាយុចាប់ពី 18 ឆ្នាំឡើងទៅ អ្នកបង្កើតមាតិកាអាចបន្ថែមការស្ទង់មតិក្នុងខមមិន ហើយការខមមិនជារូបភាពច្រើនសន្លឹកអាចដាក់រូបភាពបានរហូតដល់ 9 សន្លឹក បូករួមទាំង iPhone Live Photos ផងដែរ។ លើសពីនេះ ក្រុមហ៊ុនក៏បានបន្ថែមប៊ូតុង "Your Music" នៅលើកម្រងព័ត៌មាន និងឧបករណ៍កំណត់ពេលបង្ហោះវីដេអូលក់ទំនិញលើ TikTok Shop ផងដែរ។
Instagram៖ ស្លាកសម្គាល់ AI កាន់តែច្បាស់លាស់
Instagram បានប្តូរឈ្មោះស្លាក "AI Creator" ទៅជា "AI-Generated Profile" វិញ ដែលនឹងបង្ហាញនៅក្បែរប្រវត្តិរូបនិងមាតិការបស់គណនីនោះ។ ការព្រមានគឺច្បាស់លាស់ណាស់៖ កម្រងព័ត៌មានដែលបង្កើតដោយ AI ហើយមិនបានដាក់ស្លាកសម្គាល់ អាចនឹងត្រូវកាត់បន្ថយការទៅដល់អ្នកមើល (reach)។ ជាមួយគ្នានេះ Instagram ក៏កំពុងធ្វើតេស្តមុខងារ Music Highlights លើប្រព័ន្ធ iOS, ប៊ូតុង "Next post" នៅចុងបញ្ចប់នៃប្រអប់ខមមិន ព្រមទាំងចលនាបែបជីវចលនិងរំញ័រថ្មីសម្រាប់ប៊ូតុងសកម្មភាពនានាផងដែរ។
ប្រភព៖ Creator Weekly, SocialBee
រូបភាព៖ YouTube (ប្រភព)
